Swit a derversman delwil ki dapre ranseyman Rezistans ek Alternativ provenir depi tiyo CEB, Leta ek CEB bizin azir prioriterman par rapor a lasante piblik :
1) Bizin ki Leta ek CEB kominik lor sitiasion aktiel – ki finn arive – ki sibstans inn deverse – kantite sibstans inn deverse etc.
2) Bizin ki Leta pran mezir aproprie pou sekiriz bann dimounn dan rezion Cassis/Les Salines.
3) Ki CEB kominik o pli vit lor natir de bann prodwi ki finn fwite ek zot konsekans potansiel lor lasante piblik.
4) Ki Leta fer bann test imedia lor toxixite ler ek dilo ek konsey dimounn lor ki bizin fer si zot pa santi zot bien.
Rezistans ek Alternativ dimann a seki tou linformasion konsernan sa deversman la kominike de fason ofisielman an piblik parski sa potansielman poz enn menas a lavi dimounn ek dan lagon.
Sa levennman la vinn demontre ankor enn fwa lirzans ki Repiblik Moris ena pou fer tranzision pou lenerzi renouvlab ek aret depandans enerzetik depi fosil kouma delwil lour ek lezot prodwi petrolie. Sa osi demontre ki proze bunkering reprezant enn veritab danze pou lekosistem ek lavi dimounn ek ki Leta bizin renons a tou proze bunkering de ninport ki prodwi petrolie dan dilo Repiblik Moris.
Dany Marie Stefan Gua